Эмэгтэйчүүдийн волейболын ДАШТ Тайланд улсын нийслэл Bangkok болон Phuket, Chiang Mai, Nakhon Ratchasima гэсэн 4 хотод зохиогдож байгаа билээ. Эмэгтэйчүүдийн ДАШТ-ий шөвгийн 16-ийн эхний хоёр тоглолт болж өнгөрлөө.

Тэмцээний А хэсгийг 3 хожиж тэргүүлсэн дэлхийн чансааны №8 Нидерландын шигшээ баг болон тэмцээний H хэсгээс хоёрдугаар байраар шалгарсан сүүлчийн хоёр ДАШТ-ий аварга Сербийн шигшээ багуудын хооронд гал гарсан халуухан тоглолт болж өнгөрлөө. Тоглолтын эхний хоёр сетэд Нидерландын шигшээ баг 27:25; 26:24 харьцаатай хожсон ч Сербийн шигшээ баг гайхалтай эргэн ирэлт хийж 25:22; 25:20 харьцаатай хожиж сетийн харьцааг тэнцүүлэв. Шийдвэрлэх тав дахь сетийн тоглолтод Нидерландын шигшээ баг 15:11 харьцаатай илүүрхэж ДАШТ-ий шөвгийн наймд шалгарлаа.

Тус тоглолтод Нидерландын шигшээ багаас багийн ахлагч Nika Daalderop 19 оноо авч багаа тэргүүлсэн бөгөөд багийн 5 тоглогч мөн 10-с дээш оноо авсан байна. Харин эсрэг баг Сербийн шигшээ багаас Aleksandra Uzelac гайхалтай байж 31 оноо авсан бол Vanja Ivanovic 24 оноо авч тус болсон ч тэмцээнийг шөвгийн 16-с өндөрлүүлж байна. Харин шөвгийн 8-д шалгарсан Нидерландын шигшээ баг ДАШТ-ий гурван удаагийн аварга Японы шигшээ багтай таарсан байна.

Тэмцээний Н хэсгийг 3 хожиж тэргүүлсэн ДАШТ-ий гурван удаагийн аварга Японы шигшээ баг болон тэмцээний А хэсгээс хоёрдугаар байраар шалгарсан дэлхийн чансааны №18 талбайн эзэн Тайланд улсын шигшээ багуудын хооронд тоглолт болж өнгөрлөө. ДАШТ-ий гурван удаагийн аварга Японы шигшээ баг эхний сетэд илүүрхэж 25:20 харьцаатай хожсон бөгөөд хоёр болон гуравдугаар сетэд тэнцүү шахам өрсөлдсөн ч 25:23; 25:23 харьцаатай Японы шигшээ баг сетийн харьцаа 3:0-р буулган авснаар шөвгийн наймд шалгарч чадлаа.

Тус тоглолтод Японы шигшээ багаас багийн ахлагч Mayu Ishikawa жигд сайн байж 14 оноо авсан бөгөөд багийн голын хаагч Haruyo Shimamura 12 оноо авч багтаа тус хүргэлээ. Харин талбайн эзэн Тайландын шигшээ багаас Chatchu-On Moksri 12 оноо авч багаа тэргүүлсэн ч тэмцээнийг шөвгийн 16-с өндөрлүүлж байна. Харин шөвгийн наймд шалгарсан Японы шигшээ баг хүчирхэг Нидерландын шигшээ багтай тоглоно.