Хөнгөн атлетикийн насанд хүрэгчдийн дэлхийн аварга шалгаруулах тэмцээн 20 дахь удаагаа Япон улсын Токио хотод 9-р сарын 13-ний өдрөөс болох гэж байна.

Нийт 200 гаруй орны баг тамирчид 49-н багц медалийн төлөө өрсөлдөх уг тэмцээн есөн өдрийн турш үргэлжлэх юм. Манай улсаас төлөөлж эрэгтэй, эмэгтэй марафон гүйлтийн төрөлд тус бүр хоёр тамирчин оролцох юм. Монгол Улсын гавьяат тамирчин Б.Сэр-Од дэлхийн чансааны 66 дугаарт эрэмбэлэгдсэнээр ДАШТ-д оролцох эрхтэй болсон. Энэ нь түүний хувьд 12 дахь удаагаа ДАШТ-д уралдах болзлоо хангаж байгаа юм. 2023 онд ДАШТ-ий марафон гүйлтэд Б.Сэр-Од гавьяат 11 дэх удаа уралдсан, дэлхийн цор ганц тамирчин болж, Гиннесийн дээд амжилтын эзэн болж байлаа. Өдгөө 44 настай Б.Сэр-Одын хувьд Япон улсад бэлтгэлээ хангаж байна.

Мөн эрэгтэй төрөлд олон улсын хэмжээний мастер Ц.Бямбажав, эмэгтэйчүүдээс олон улсын хэмжээний мастер Б.Мөнхзаяа, Г.Хишигсайхан нар ДАШТ-д өрсөлдөх эрхээ авсан байна.