Олон улсын сагсан бөмбөгийн холбооноос зохион байгуулдаг 16 хүртэлх насны Ази тивийн аварга шалгаруулах 8 дахь удаагийн тэмцээн манай улсад болно. Тус тэмцээн өмнө нь 7 удаа зохион байгуулагдаж байсан бөгөөд эхний гурван удаагийн тэмцээнд БНХАУ-ын 16 хүртэлх насны шигшээ баг түрүүлж байсан. Харин 2015 онд Индонез улсын нийслэл Жакарта хотод БНСУ-ын шигшээ баг түрүүлж байсан бөгөөд сүүлчийн гурван Ази тивийн аваргад Австралийн шигшээ баг 17 тоглолтод оролцож 17 хожсон гайхамшигтай амжилт үзүүлж бүгдэд нь түрүүлж байв. Уг тэмцээнд манай улсын шигшээ баг анх удаагаа оролцож байгаа бөгөөд мөн тэмцээнийг зохион байгуулж байгаагаараа онцлогтой юм. ААШТ 8-р сарын 31-с 9-р сарын 7 хүртэл М банк Арена болон Буянт-Ухаа цогцолбор гэсэн хоёр ордонд хуваагдан зохион байгуулагдана.

Тэмцээний дүрмээс танилцуулахад нийтдээ 16 улсын шигшээ баг 4 хэсэгт хуваагдан тоглох бөгөөд хэсэг бүрийг толгойлсон багууд шууд хагас шигшээд шалгарна. Харин хэсгийн хоёр болон гуравдугаар байрт шалгарсан улсын шигшээ багууд хоорондоо нэмэлт плей-оффын тоглолт хийж хожсон багууд нь шөвгийн наймд шалгарна. Манай шигшээ баг D хэсэгт хуваагдсан бөгөөд ААШТ-ий гурван удаагийн аварга БНХАУ, ААШТ-ий аварга БНСУ, Малайзын шигшээ багуудтай учраа таарчээ. 

Монгол улсын 16 хүртэлх насны шигшээ багийн ахлах дасгалжуулагчаар Ц.Азбаяр ажиллана.

Монгол улсын 16 хүртэлх насны шигшээ багийн бүрэлдэхүүн:

Багийн ахлагч: Д.Сүхбат, Ц.Давааням, Х.Билэгт, Б.Чинзориг, Г.Түвшинтөр, Н.Чингүнжав, М.Мөнх-Эрдэнэ, О.Ханхүслэн, Э.Өнөболд, Э.Маргад-Эрдэнэ, Э.Мөнхжин нар дуудагдсан байна.

Монгол улсын 16 хүртэлх насны шигшээ багийн тоглолтын хуваарь:

8-р сарын 31-нд 19:00 цагаас БНХАУ-Монгол ( М Банк Арена)

9-р сарын 1-нд 19:00 цагаас Монгол-БНСУ (Буянт-Ухаа Цогцолбор)

9-р сарын 2-нд 19:00 цагаас Малайз-Монгол (М Банк Арена)

Монгол улсын 16 хүртэлх насны шигшээ багтаа амжилт хүсье.