2026 оны хөлбөмбөгийн ДАШТ-ий хэсгийн шатны тоглолтууд үргэлжилж, А болон В хэсгийн багууд хоёр дахь тоглолтуудаа хийлээ. Канадын шигшээ баг нутаг дээрээ гайхалтай тоглолтыг үзүүлж, Катарыг бут ниргэсэн бол Швейцарын шигшээ баг Босни ба Герцеговины хаалганд дөрвөн гоол оруулж, итгэл төгс ялалт байгууллаа. Харин А хэсэгт Өмнөд Африкийн Бүгд Найрамдах Улс (ӨАБНУ) Чехтэй тэнцэж, тэмцээний анхны оноогоо авч чадсан юм. Мөн тэмцээнийг зохион байгуулагч Мексикийн шигшээ баг БНСУ-ын шигшээ багийг хожиж, хасагдах шатанд шалгарч буй эхний баг боллоо.

ӨАБНУ 1:1 Чех 

А хэсгийн эхний тоглолтод Чех болон ӨАБНУ-ын шигшээ багууд учраа таарч, 1:1 харьцаатай эвийн гэрээ байгууллаа. Тоглолтын эхний хагаст Чехийн шигшээ довтолгооны санаачилгыг гартаа авч, 6 дахь минутад тэргүүлийг авсан. Баруун жигүүрээс ирсэн дамжуулалтыг ашиглан Чехийн жигүүрийн хагас хамгаалагч Михал Садилек ганган цохилтоор гоол оруулж, багтаа тэргүүлэл авчирсан юм. Гэвч ӨАБНУ бууж өгсөнгүй. ӨАБНУ-ын шигшээ баг хоёрдугаар үед довтолгоогоо эрчимжүүлж, 83 дахь минутад хариу гоолыг орууллаа. ӨАБНУ-ын шигшээ багийн хагас хамгаалагч Тебохо Мокоэна торгуулийн цохилтоос гоол оруулж, 1:1 болгов. Үлдсэн хугацаанд гоол оролгүй хоёр баг эвийн гэрээ байгууллаа.

Швейцар 4:1 Босни ба Херцеговин

B хэсгийн хоёрдугаар тойргийн эхний тоглолт Швейцарын шигшээ баг Босни ба Херцеговины шигшээ багуудын хооронд явагдаж, 4:1 харьцаатайгаар Швейцарын шигшээ баг ялалт байгууллаа. Тоглолтын 74 дэх минутад сэлгээгээр орж ирсэн Йохан Манзамби тооны харьцааг нээж, Швейцарын шигшээ баг тэргүүлийг авав. Түүний гоолоос ердөө 6 минутын дараа Боснийн хамгаалагч Тарик Мухаремович улаан хуудас авснаар тоглолтын хувь заяа бүрэн эргэв. Рубин Варгас 84 дэх минутад хоёр дахь гоолыг, Манзамби 90 дэх минутад өөрийн дублийг хийж гурав дахь гоолыг оруулав. Нэмэлт цагийн 90+3 дахь минутад Эрмин Махмич гоол оруулсан ч  Гранит Шака торгуулийн цохилтоос гоол оруулж, тоог 4:1 болгосноор Швейцарын шигшээ баг хожил байгуулж, B хэсгийг Канадын шигшээ багийн хамт 4 оноотойгоор тэргүүлж байна.

Канад 6:0 Катар

Тоглолтын 16 дахь минутад Кайл Ларин эхний гоолыг оруулсан бол Жонатан Дэвид 29 болон 45+3 дахь минутад дубль хийж эхний үеийг 3:0 харьцаатайгаар өндөрлүүлэв. Хоёрдугаар үед Натан-Дэвид Салиба 64 дэх минутад дөрөв дэх гоолыг, Катарын Мохаммед Манай 75 дахь минутад өөрийн хаалганд автогоол оруулж, тав дахь гоолыг хаалгандаа алдлаа. Харин Жонатан Дэвид 90+2 дахь минутад хет-трикээ гүйцээж тоглолтын эцсийн цэгийг тавив. Ингэснээр Канадын шигшээ баг Швейцарын шигшээ багийн адил 4 оноотой болж, хэсгийг тэргүүлж байна.

Мексик 1:0 БНСУ

А хэсгийн тэргүүн байрын төлөөх тоглолтод тэмцээнийг зохион байгуулагч Мексикийн шигшээ баг болон БНСУ-ын шигшээ багуудын тоглолт 1:0 харьцаатайгаар Мексикийн шигшээ багийн хожлоор өндөрлөлөө. Энэхүү тоглолтын цорын ганц гоолыг Луис Ромо 50 дахь минутад хаалгач, хамгаалагчийн маш том алдааг ашиглаж, багаа хожилд хүргэлээ. Ингэснээр Мексикийн шигшээ баг “A” хэсгийг тэргүүлж, ДАШТ-ий хасагдах шатанд шалгарч буй эхний баг боллоо.

Эдгээр багуудын хэсгийн сүүлийн тоглолтууд (Монголын цагаар):

06-р сарын 25-нд

03:00

цагаас — Швейцар vs Канад

03:00

цагаас — Босни ба Херцеговин vs Катар

09:00

цагаас — ӨАБНУ vs БНСУ

09:00

цагаас — Чех vs Мексик

Мэдээллийн ивээн тэтгэгч: ҮҮЭТ ХХК ЭВТ БРЭНД