Их Британи улсын Ливерпүүл хотод болж буй Боксын дэлхийн аварга шалгаруулах тэмцээний жин бүрийн ээлжит тоглолтууд үргэлжилсээр. Монгол улсаа төлөөлөн эрэгтэй, эмэгтэй 10 жинд нийт 10 тамирчин өрсөлдсөн ба өмнө нь гурван тамирчин тэмцээнээ өндөрлүүлсэн талаар мэдээлсэн.

Монголын цагаар өнөөдөр үүрээр хэд хэдэн тулаан болсон ба тулааны үр дүнг хүргэе.

Эрэгтэйчүүдийн 70 кг-д О.Бямба-эрдэнэ Турк улсын тамирчин Некат Екинчитэй тулалдаж хажуугийн шүүгчдийн 3:2 саналаар ялалт байгуулж шөвгийн 8-д шалгарсан амжилт үзүүллээ. Түүний дараагийн өрсөлдөгч Эзэн орон буюу Английн тамирчин Одел Камара бөгөөд хэрвээ ялалт байгуулвал хагас шигшээд шалгарана.

Эмэгтэйчүүдийн 54 кг-ын жинд өрсөлдсөн О.Есүгэн эхний шатанд гоц мөргөж, шигшээ 16-д Тайваны тамирчин HUANG Hsiao-Wen-тэй тулалдаж, 5-0 шүүгчдийн саналаар харамсалтайгаар тэмцээнээ өндөрлүүллээ.

Эмэгтэйчүүдийн 48 кг-ын жинд өрсөлдөх гэж буй Л.Алтанцэцэг эхний шатанд гоц мөргөсөн ба эхний учраандаа Туркын боксчин CAGIRIR Ayse-тай өнөөдөр шөнө тулалдана.

Эрэгтэйчүүдийн 50 кг-ын жинд А.Баттулга эхний шатандаа хийлсэн ба өнөөдөр шөнө шигшээ 8-д шалгарах эрхийн төлөө БНСУ-ын тамирчин YOON Taegeun-тай тулалдана.

Эрэгтэйчүүдийн 60 кг-ын жинд эхний учраандаа ялалт байгуулсан Г.Лундаа өнөөдөр шигшээ 16-д шалгарах эрхийн төлөө Канадын тамирчин AL-AHMADIEH Keoma-Ali-тай тулалдах болно.

Эрэгтэйчүүдийн 55 кг-ын жинд мөн эхний учраандаа ялалт байгуулсан Х.Билгүүнсайхан шигшээ 8-д шалгарах эрхийн төлөө Азербайжаны боксчин HUSEYNOV Nijat-тай өнөөдөр шөнө тулалдах болно.

Эмэгтэйчүүдийн 51 кг-ын жинд өрсөлдөж буй Б.Мөнгөнсаран мөн шигшээ 8-д шалгарах эрхийн төлөө Мексикийн тамирчин PATINO Esmeralda Jazmin-тай өнөөдөр шөнө тулалдана.

Нийт тамирчдадаа амжилт хүсье!