Улаанбаатар хотын 9 дүүргийн нийт ЕБС-иудын дундах Улаанбаатар Кап тэмцээн амжилттай үргэлжилж байна. Нийт 15.000 гаруй сурагчид оролцож буй өргөн цар хүрээтэй тус тэмцээний Ахлах ангиллын эрэгтэй эмэгтэй тус тус шилдэг 32 баг тодорсон бол үргэлжлүүлэн Дунд, бага ангиллын тоглолтууд явагдаж байх энэ үед Монголын ууган, шилдэг Их сургуулиудын нэг Санхүү Эдийн Засгийн Их Сургуультай хамтран ажиллахаар боллоо.

Тодруулбал саяхан Монголын ууган, топ их сургуулиудын нэг Санхүү Эдийн Засгийн Их Сургууль нь Улаанбаатар Кап тэмцээний шилдэг тоглогчдод 100 хувийн сургалтын тэтгэлэг олгохоор болсон ба өнөөдөр албан ёсоор санамж бичигт гарын үсэг зурлаа.

Энэхүү тэтгэлгийн зорилго нь ЕБС-ийн сурагчдыг спортоор хичээллэж, зөв төлөвшилтэй болохыг дэмжих, сурагчдад бодит дэмжлэг болон спортоор дамжуулж эерэг дүр төрх, зөв үлгэр дуурайллыг бүтээх юм. Мөн сурагч тамирчдын ур чадвар, хичээл зүтгэлийг бодитоор үнэлэхээс гадна тэдний цаашдын боловсролыг дэмжих, спорт ба боловсролын уялдаа холбоог бэхжүүлэх зорилготойг Санхүү Эдийн Засгийн сургуулийн зүгээс онцоллоо.

СЭЗИС-ийн Бакалаврын сургалтын албаны дарга Н.Мөнхжаргал

"СЭЗИС-ийн хувьд спортын авьяастай, чадварлаг сурагчдыг дэмжин, 100% үнэ төлбөргүй суралцах боломж олгож буйдаа баяртай байна. Бид сагсан бөмбөгийн төрлөөр онцгой амжилт үзүүлсэн шилдэг сурагчдыг боловсрол болон спортыг нь хослуулан амжилттай хичээллүүлж, сургуулийнхаа нэрийг гаргасан шилдэг тамирчид төрөн гарна гэдэгт итгэлтэй байна" хэмээн хэлсэн юм.

СЭЗИС-ийн оюуны шигшээ багийн дасгалжуулагч, ОУХМ Б.Пүрэвдорж:

"Бид тэтгэлэгт оюутан шалгаруулж авахдаа чадварлаг онцгой гэхээс илүүтэй багаа тоглуулж чаддаг, багаа нэгдүгээрт тавьдаг, талбай дээр ч, талбайн гадна ч ёс зүйтэй сурагчид сонгож авахыг хичээх болно" хэмээн тэтгэлэгт оюутан сонгож авах сэтгэгдлээсээ хуваалцсан юм.

Санхүү Эдийн Засгийн Их Сургууль нь олон улсын жишигт нийцсэн, дижитал, энтрепренер чиг баримжаатай их сургууль бөгөөд оюутан төвтэй сургалтын орчныг бүрдүүлж, чадварлаг мэргэжилтэн бэлтгэдгээрээ танигдсан билээ. Мөн СЭЗИС-ийн оюутны шигшээ баг Оюутны лигт тасралтгүй олон жил амжилттай оролцсоор ирсэн ба сагсан бөмбөгийн ОУХМ Б.Болортулга тэргүүтэй шилдэг тоглогчдоос эхлүүлэн Үндэсний Дээд лигийн MVP А.Азбаяр, SG Apes багийн тоглогч Б.Тулуй зэрэг олон чадварлаг тамирчдыг өлгийдөн авсан билээ.