Аравдугаар сарын 26-нд “Сантьяго Бернабеу” цэнгэлдэх хүрээлэнд дахин нэг Эль Класико өрнөлөө. Дэлхийн 200 гаруй оронд сая сая үзэгч энэ домогт тулааныг хүлээн үзсэн бөгөөд хоёр багийн тоглогчид гайхамшигтай тоглолт үзүүлж, эцэст нь талбайн эзэд 2:1-ээр ялалт байгуулсан юм. Олон улсын 1xBet брэнд ивээн тэтгэдэг эдгээр хоёр багийн дундах хамгийн дурсамжтай тоглолтуудаас онцлон хүргэе.

Реал Мадрид – Барселона 0:5 (1974 оны 2-р сарын 16, Ла Лиг)

Барселона 1960 оноос хойш анх удаа аваргын төлөө хүчтэй өрсөлдөж байсан тэр улиралд шинэхэн тоглогч Йохан Кройфийн тоглолт төгс байсан фенүүд болон сэтгүүлчид түүнийг магтаж, бараг л шүүмжлэл гарч байгаагүй. Гэвч “Барса”-д дараагийн олон жилд бэлгэ тэмдэг болохоор том ялалт хэрэгтэй байлаа. Тэр өдөр Каталончууд яг тэр ялалтаа авсан юм. Хуан Мануэль Асенсигийн хоёр гоол, Кройф, Хуан Карлос, Хюго Сотил нарын нэг нэг гоол “Бернабеу”-г нам гүм болгожээ.

Реал Мадрид – Барселона 5:0 (1995 оны 1-р сарын 6, Ла Лиг)

“Мадридчууд” өмнөх жил “Камп Ноу”-д 0:5-ээр бут ниргүүлсний өшөөг авахыг хүсэж байв. Йохан Кройфийн “Мөрөөдлийн баг” (Dream Team) аль хэдийн задарч эхэлсэн байсан тул урам зориг дүүрэн Реал Мадрид өрсөлдөгчийнхөө асуудлыг ашиглаж чадсан юм. Иван Заморано хэттрик хийж, Хосе Амависка болон ирээдүйн “Барселона”-гийн домог Луис Энрике нар тус бүр нэг гоол оруулсан. Харин Микаэль Лаудруп тун өвөрмөц амжилтад хүрсэн тэр жил дараалан 5:0-ээр ялсан хоёр багийн бүрэлдэхүүнд тоглосон цорын ганц тоглогч болсон юм.

Барселона – Реал Мадрид 2:0 (2000 оны 10-р сарын 21, Ла Лиг)

Энэ тоглолтын үр дүн биш, харин сэдэв нь л анхаарлын төвд байв. Луис Энрике, Симан нарын гоол Барселонад ялалт авчирсан ч талбай дээрх гол дуулиан бол Луиш Фигогийн эсрэг уур хилэн байлаа. Зуны солилцооны цонхоор Португал тоглогч Барселонагаас Реал Мадрид руу шилжсэн нь Каталончуудын хувьд урвалт байв. Тэр үед “Камп Ноу”-гийн үзэгчид Фигогийн зүг рүү шарсан гахайн толгой хүртэл шидсэн юм.

Барселона – Реал Мадрид 5:0 (2010 оны 11-р сарын 29, Ла Лиг)

“Мадридчууд” асар их хөрөнгө зарцуулж, Жозе Моуриньогийн удирдлага дор аваргын баг босгохоор зорьж байлаа. Гэвч хүчтэй багийг өдрөөр биш, жилээр байгуулдаг гэдгийг тэд ойлгоогүй. Реал Мадрид “Барса”-тай тэнцүү тоглохыг оролдсон ч төлөвлөгөө бүрэн нурав. Давид Вильягийн хоёр гоол, Шави, Педро, Жефрен Суарез нарын гоол Барселонагийн тэр үеийн тоглолт төгс байсныг батлав.

Реал Мадрид – Барселона 0:2 (2011 оны 4-р сарын 27, Аваргуудын лигийн хагас шигшээ)

Реал Мадрид хэзээ ч хамгаалалт, сөрөг довтолгоонд тулгуурласан тоглолтын хэв маягаар ялалт байгуулахад дуртай байгаагүй. Гэсэн ч Барселонаг ялах хүсэл энэ удаад бүхнээс хүчтэй байв. Энэхүү тактик долоо хоногийн өмнө болсон “Эзэн хааны цом”-ын шигшээ тоглолтод амжилттай хэрэгжиж, ялалт авчирсан байсан юм. Аваргуудын лигийн тоглолтын өмнө Жозе Моуриньо уламжлал ёсоор сэтгэлзүйн тоглоом эхлүүлж, харин Пеп Гвардиола уур хилэнгээ барьж дийлэлгүй Португал дасгалжуулагчийг “puto jefe” (“новшийн дарга”) хэмээн дуудав. Харин тоглолтын шийдвэрлэх мөч нь Пепегийн маргаантайгаар гарч хөөгдсөн улаан хуудас байлаа. Үлдсэн 10 тоглогч хамгаалалтдаа анхаарч, Криштиано Роналдог урд үлдээн сөрөг довтолгооны боломж хүлээж байсан ч талбайн бүх хэсэгт хамгаалахад хэцүү байв. Тэр үед Лионель Месси хоёр гоол оруулсан бөгөөд түүний хоёр дахь гоол Мадридын бүх хамгаалалтыг нэвт сүлбэн хийсэн тэр агшин хөлбөмбөгийн түүхэнд үүрд мөнхөрнө. Моуриньо ч чимээгүй үлдсэнгүй. Хэвлэлийн хурлын үеэр “por qué?” (“яагаад?”) хэмээн дахин дахин асуусан түүний үгс Эль Класикогийн түүхийн нэг хэсэг болон үлдсэн билээ.