Английн мэргэжлийн хөлбөмбөгчдийн холбоо буюу PFA-гийн 2026 оны шагнал гардуулах ёслол Манчестер хотод болж, 2025/26 оны Премьер лигийн улирлын шилдгүүдийг тодрууллаа. Хамгийн нэр хүндтэй PFA Players’ Player of the Year шагналыг “Манчестер Юнайтед”-ын ахлагч Бруно Фернандеш хүртлээ.

Бруно Фернандеш Премьер лигийн 2025/26 улирлын шилдгээр тодорлоо

Португал хагас хамгаалагч өнгөрсөн улиралд “Юнайтед”-ын тоглолтын гол хөдөлгүүр болж, Премьер лигт 9 гоол, рекорд 21 гоолын дамжуулалт өгсөн юм. Ингэснээр тэр тус тэмцээний нэг улиралд хамгийн олон ассист өгсөн тоглогч болж, өмнөх дээд амжилтуудыг шинэчилсэн байна.

Фернандешийн хувьд энэ нь бүр ч онцгой амжилт. Тэрээр 2010 онд Уэйн Руни хүртсэнээс хойш “Манчестер Юнайтед”-ын PFA Player of the Year шагналын анхны эзэн болжээ. Мөн энэ улирлын Football Writers’ Association-ийн оны шилдэг тоглогчийн шагналыг хүртсэн тул хувийн томоохон шагналуудын цуглуулгаа нэмэгдүүлэв.

Нико О’Райли Премьер лигийн 2025/26 улирлын шилдэг залуу тоглогчоор тодорлоо

Харин PFA Young Player of the Year шагналыг “Манчестер Сити”-гийн Нико О’Райли хүртлээ. 21 настай тоглогч 2025/26 оны улиралд олон байрлалд тоглож, “Манчестер Сити”-гийн бүрэлдэхүүнд чухал үүрэг гүйцэтгэсэн бөгөөд Английн шигшээ багийн хамт 2026 оны ДАШТ-д оролцсон.

О’Райлигийн хувьд энэ нь мэргэжлийн тоглогчдын саналд үндэслэдэг нэр хүндтэй шагналыг анх удаа хүртэж байна.

PFA Premier League Team of the Year

2025/26 оны Премьер лигийн шилдэг 11-д Английн аварга “Арсенал”-ын таван тоглогч багтсан нь анхаарал татав. “Манчестер Сити” дөрвөн тоглогчтойгоор удаалсан бол “Манчестер Юнайтед” болон “Брентфорд” тус бүр нэг төлөөлөлтэй байна.

Хаалгач

• Давид Рая — Arsenal

Хамгаалагч

• Габриэл Магальяйнс — Arsenal
• Нико О’Райли — Manchester City
• Уильям Салиба — Arsenal
• Юрриен Тимбер — Arsenal

Хагас хамгаалагч

• Бруно Фернандеш — Manchester United
• Деклан Райс — Arsenal
• Раян Шерки — Manchester City

Довтлогч

• Эрлинг Холанд — Manchester City
• Антуан Семеньо — Manchester City
• Игор Тьяго — Brentford

Ийнхүү Премьер лигийн аварга “Арсенал” улирлын шилдэг багт хамгийн олон буюу таван тоглогчоо оруулсан бол “Манчестер Сити” дөрвөн тоглогчтой багтжээ. Харин Эрлинг Холанд 27 гоолтой, Игор Тьяго 22 гоолтой улирлыг өндөрлүүлсэн бол Бруну Фернандешийн 21 ассист Премьер лигийн шинэ дээд амжилт болсон нь түүнийг PFA-ийн хамгийн том шагналыг авахад гол нөлөө үзүүлсэн байна.