АНУ-д зохион байгуулагдаж буй клубүүдийн ДАШТ цоо шинэхэн форматаар амжилттай үргэлжилж байна. Шөвгийн 16-ийн тоглолтууд маш сонирхолтой болж байна.

E хэсгийн нэгдүгээр байраар шалгарсан Италийн алдарт Милан хотын Inter Milan клуб F хэсгийн хоёрдугаар байраар шалгарсан Бразилын алдарт Fluminense клубүүдийн хооронд гоёмсог тоглолт болж өнгөрлөө. Тоглолт дөнгөж эхлээд 3 дахь минутад Inter Milan клубийн хамгаалалтын маш том алдааг Fluminense клубийн хашир туршлагатай довтлогч өдгөө 37 настай Germán Cano гоол оруулж эхний хагасыг Бразилын Fluminense клуб тэргүүлэв. 

Улмаар тоглолтын хоёрдугаар хагаст Inter Milan клуб аюултай маш олон довтолгоог гүйцэтгэсэн ч хаалганы шон Fluminense клубийг хоёр ч удаа аврав. Чи хийхгүй бол би хийе гэсэн хөлбөмбөгийн бичигдээгүй дүрмийн адилаар тоглолтын 90+3 дахь минутад Fluminense клубийн хагас хамгаалагч Hércules зүүн хөлийн гоёмсог цохилтоор гоол оруулж энэхүү тоглолтын эцсийн цэгийг тавьж шөвгийн наймд шалгарч чадлаа. Тэдний эсрэг шөвгийн наймд Азийн төлөөлөл Саудын Арабын Al Hilal клуб тоглоно.

G хэсгийн нэгдүгээр байраар итгэл төгс шалгарсан Английн Manchester City клуб H хэсгийн хоёрдугаар байраар шалгарсан Ази тивийн төлөөлөл Al Hilal клубүүдийн хооронд гайхамшигтай тоглолт болж өнгөрлөө. Тоглолтын 9 дэх минутад Manchester City клубийн Bernardo Silva гоол оруулж эхний хагасыг Manchester city клуб 1:0 харьцаатай илүүрхэв.

Тоглолтын хоёрдугаар хагас эхлээд Al Hilal клуб эхний довтолгоогоороо буюу тоглолтын 46 дахь минутад Marcos Leonardo мөргөж гоол оруулан 1:1 болгов. Улмаар тоглолтын 52 дахь минутад Al Hilal клубийн сөрөг довтолгоо João Cancelo-ийн дамжуулалтаар Malcom гоол оруулж 1:2 харьцаатай Al hilal клуб тэргүүлж эхлэв. Гэсэн ч түүний гоолоос гуравхан минутын дараа Manchester city клубийн довтлогч Erling Haaland гоол оруулж 2:2 харьцаатай үндсэн цаг дуусаж нэмэлт 30 минутыг сунгахаар болов. Нэмэлт цагийн 94 дэх минутад булангийн цохилтоос Rúben Neves-ийн дамжуулалтаар Kalidou Koulibaly гоол оруулж 2:3 болгон дахин тэргүүлж эхлэв. Тоглолтын 104 дэх минутад Manchester city клубийн шинэ цэрэг Rayan Cherki-ийн гайхалтай дамжуулалтаар Phil Foden гоол оруулж 3:3 болгов. Тоглолтын 112 дахь минутад Al hilal клубийн Sergej Milinković-Savić хаалга руу мөргөсөн бөмбөгийг Manchester city клубийн хаалгач Ederson хааж чадсан ч Marcos Leonardo нэмж цохисноор энэхүү тоглолтод Ази тивийн төлөөлөл Al Hilal клуб хожиж шөвгийн наймд шалгарлаа. Тэдний шөвгийн наймын өрсөлдөгчөөр Бразилын Fluminense клуб хүлээж байгаа.