Өнгөрсөн шөнө шөвгийн 16-ийн сүүлийн хоёр тоглолт болж, шөвгийн наймын бүх багууд албан ёсоор тодорлоо. Урд шөнийн эхний тоглолт дэлхийн аварга Аргентины шигшээ баг Египетийг гайхалтай эргэн ирэлтээр хожсон бол Швейцар, Колумбын хоорондын тулаан 120 минутын турш гоолгүй үргэлжилж, эцэст нь торгуулийн цохилтоор шийдэгдэв.

Аргентин 3:2 Египет

Египет тоглолтыг тун гайхалтай эхлүүлж, 15 дахь минутад Яссер Ибрахим тооны харьцааг нээв. Үүний дараахан Аргентин тэнцүүлэх алтан боломж гаргасан ч 21 дэх минутад Лионель Мессигийн торгуулийн цохилтыг Египетийн хаалгач хааснаар эхний үе Египетийн 1:0-ийн давамгайлалтай өндөрлөв. Хоёрдугаар үед Египетийн сөрөг довтолгоо амжилттай хэрэгжиж, 67 дахь минутад Мостафа Зико гоол оруулснаар дэлхийн аваргуудыг 2:0-ээр хүнд байдалд орууллаа. Египет үүнээс өмнө нэг удаа гоол оруулсан ч шүүгч VAR үзэж, гоолыг тооцоогүй. Гэвч аваргуудын зангараг тоглолтын төгсгөлд илэрч тоглолтын 79 дэх минутад Кристиан Ромеро Мессигийн дамжуулалтыг мөргөж гоол оруулан тоог ойртуулсан бол ердөө дөрөвхөн минутын дараа Лионель Месси өөрөө гоол оруулж, 2:2 болголоо. Улмаар үндсэн цаг дуусаж 90+3 дахь минутад Лаутаро Мартинесийн дамжуулалтыг Энцо Фернандес мөргөн хаалганд оруулснаар Аргентин ердөө 13 минутын дотор гурван гоол хийж, 3:2-ийн харьцаатай гайхамшигт эргэн ирэлтээр шөвгийн наймд шалгарлаа. Ингэснээр аваргууд шөвгийн 8-д Швейцарын шигшээ багтай тоглохоор боллоо.

Швейцар /4/ 0:0 /3/ Колумб 

Өнгөрсөн шөнийн хоёр дахь тоглолт Канадын Ванкувер хотод болж, Швейцар болон Колумбын шигшээ багууд учраа таарлаа. Хоёр баг тоглолтын турш маш нягт хамгаалалттай тоглож, үндсэн 90 минут төдийгүй нэмэлт 30 минутын турш нэг ч гоол оруулсангүй. Колумб довтолгооны хувьд арай илүү байсан ч Швейцарын хаалгач Грегор Кобель хэд хэдэн гайхалтай хаалт хийж, багаа тоглолтод авч үлдсэн юм. Ингээд хувь заяаг торгуулийн цохилт шийдэхэд Швейцар 4:3-аар ялалт байгууллаа. Энэ ялалтаар Швейцарын шигшээ баг ДАШТ-ий шөвгийн наймд шалгарч, Аргентины эсрэг тоглох эрхээ авсан бол Колумб ийнхүү тэмцээнээ өндөрлүүлэв.

📝 Мэдээллийн ивээн тэтгэгч:

🤝 ҮҮЭТ ХХК ЭВТ БРЭНД - Эрүүл хүнсийг Эвт брэндээс

🤝 VNG Travel - Европыг танд илүү ойртуулна.

Selfy - Олон Улсын Дата Сим - Дурсамж дүүрэн аялалд хамтдаа