"Евро Баскет 2025" тэмцээний А, В хэсгийн тоглолтууд болж өндөрлөлөө. Тус тоглолтууд өчигдөр буюу 09-р сарын 01-нд Латвийн Рига болон Финландын Тампере хотод зохиогдов.

А, B хэсгийн тоглолтуудад ямар тоглогчид гялалзав?

B хэсэгт тун хүнд байдалд байсан Монтенегро баг өчигдөр хэсгийн анхны хожлоо авлаа. Тус тоглолтод Никола Вучевич өөрийн онцгой хувийн тоглолттоо харуулсан бөгөөд Монтенегро баг хэсэгтээ Шведийн багийг 87:81-ээр буулгаж авлаа. Ахмад тоглогч Вучевич гайхалтай тоглож, 23 оноо, 15 самбараас бөмбөг авсан ба 4 оновчтой дамжуулалт, 3 хаалт гүйцэтгэжээ. Харин нөгөө талд Шведүүдээс Пэлле Ларссон хожигдохыг хүсээгүй нь харагдаж байлаа. Учир нь тэрбээр 28 оноо, 7 самбар, 4 оновчтой дамжуулалттайгаар талбай дээр онцгой байсан ч эцэст нь ялагдал хүлээсэн юм.

Хэсэгтээ нэг ч хожигдолгүй яваа Германчуудын амжилт үргэлжилсээр. Өчигдөр тэд хэсгийн дөрөв дэх тоглолтоо Их Британий шигшээ багийн эсрэг хийж, 120-57 харьцаатай бут ниргэлээ. Орландо Мэжик багийн тоглогч Бразил, Герман гаралтай Тристан Да Силва Европын шилдэг тоглогчдын эгнээнд орох замаа тавьж байна. Учир нь тэрбээр 18 оноо, 10 оновчтой дамжуулалттайгаар дабл-дабл хийхээс гадна 5 самбар, хоёр хаалттайгаар тоглолтыг дуусгажээ.Мөн Герман 120:57-оор өрсөлдөгчөө хожсон нь "ЕвроБаскет 1963" оноос хойших хамгийн хол зөрүүтэй ялалт болсон байна.

Тэмцээний А хэсэгт төсөөлөөгүй нэгэн баг түүх бүтээсээр. Тодруулбал Туркийн шигшээ баг хүчирхэг Серби, Латви, Чех зэрэг сагсан бөмбөгийн өндөр хөгжилтэй орнуудтай нэг хэсэгт хуваагдсан ч нэг ч хожигдолгүй 4-0 амжилттай хэсгээ тэргүүлж байна. Өчигдөр тэд хэсэгтээ Чехийн шигшээ багийн эсрэг тоглож 84-64 харьцаатай төвөггүй хожил байгууллаа. Тус тоглолтод Туркийн сахиус хэмээн нэрлэгдээд буй Алперен Сэнгүн шилдэг тоглолтоо үргэлжлүүлж 21 оноо, 8 самбар, 5 оновчтой дамжуулалт өгсөн байна. Энэ байдлаараа үргэлжилбэл Сэнгүн Ерво Баскетийн шилдэг тоглогчдын нэгээр зүй ёсоор нэрлэгдэх боломжтой.

Евро Баскетийн А хэсэгт бас нэгэн баг нэг ч хожигдолгүй амжилтаа үргэлжлүүлж байгаа нь мэдээж Сербийн шигшээ баг.

Өчигдөр тэд хэсгийн дөрөв дэх тоглолтоо Чехийн эсрэг хийж, 82:60 харьцаатай буулгаж авлаа. Багийн супер од Никола Йокич ердөө 18 минутыг талбай дээр өнгөрүүлсэн бол тэднийг хожил байгуулахад Алекса Аврамовичийн тоглолт томоохон үүрэгтэй байв. Учир нь тэрбээр тоглолт дуусахад 23 минут дутуу байхад аль хэдийн 14 оноо, 3 самбар, 8 оновчтой дамжуулалт өгсөн ба энэ нь талбай дээрх бүх тоглогчдыг тэргүүлэхэд хангалттай байлаа.