Өнгөрсөн жил бүсийн Финалд хүрсэн Миннесота Тимбервулвс баг улирлын эхлэлт 6-3 амжилттай эхлүүлснээс хойш тун муу амжилтыг үзүүлээд байгаа. Миннесота яг одоо 8-10 амжилттай бүсийнхээ 12-р байранд тун муу амжилттай Плэй-ин-ий ч гадуур явна. Энтони Эдвардс тулгарсан асуудлаа эртхэн залруулахыг хүсэж буйгаа “SneakerReporter”-т өгсөн ярилцлагадаа дурджээ.

Энтони Эдвардс дөрөв дараалж хожигдсоны дараа багийнхаа тоглогчдод хандан ам нээв. Түүний хувьд багийнхан нь бодит байдал дээр энд тэндээс цугларсан хэдэн бацаан шиг талбай дээр нялзрай тоглож байна гэж үзжээ.

Тэрбээр “Бид цугларсан хэдэн бацаан нар шиг багаараа үнэхээр сул дорой тоглож байна” хэмээн хэлжээ. Хэлсэн үг нь ч үнэний ортой. Сакрементог 4 оноогоор, Финиксийг 3 оноогоор хожсоны дараа Торонто, Бостон, Хьюстен, Сакременто зэрэг багуудад дараалан хожигдсон. Бүр сүүлийн хоёр тоглолтоо талбай дээрээ хожигдсонд Вулвсын фэнүүдэд эргэлзээ төрүүлж эхлээд байна. Тэдний хуваарь одоо хэцүү байгаа ба Лос Анжелес Клиперстэй хоёр удаа, Голден Стэйт Уарриорстой хоёр удаа, мөн Лос Анжелес Лэйкерс, Нью-Йорк Никс зэрэг багуудтай тоглох юм.